مطاعم فى مصر تمنع دخول المحجبات......................

مطاعم فى مصر تمنع دخول المحجبات

قرر أصحابى دعوتى على خروجة صيفى حلوة على ظهر مركب من مراكب النيل العايمة قلت أقبل العزومة و خصوصا أنهم شلة حلوة و مية مية و رحت فى الميعاد .. و فى العربية تلقيت خبر من أصحابى يقولون : إحنا آسفين غيرنا مكانا.. العزومة فى حتة تانية.
إفتكرت يعنى بحسن نية إن المكان مليان و محجوز .. قلت و ماله.. و رحت لهم على الحتة التانية و لما دخلت سألتهم عن سبب تغير المكان فقالوا : أصل أصحاب المركب مانعين دخول المحجبات .. ممنوع إيه..إيه..!!
ممنوع دخول المحجبات و فضلت زى الهبلة ربع ساعة أقول إيه..إيه و مش مصدقة.. و مذهولة.. و مصدومة و مهبولة..!!
و سمعت صوت يطرقع فى ودانى على طريقة الأفلام العربية بيقول بصوت عال: أنت محجبة..محجبة..محجبة..و فجأة صغرت أدام نفسى ..و إنكسفت من نفسى .. و بصيت على نفسى يا لهوى ..إخص أنا محجبة ..يعنى إيه قالعة هدومى .. لأ لابساها.. وقعت ورقة التوت اللى أنا لابساها .. و فجأة إفتكرت مايكل جاكسون لما قال مقولته الشهيرة : لو أعرف إن العرب بيسمعونى كنت بطلت أغنى .. و إفتكرت المصحف اللى بينداس برجلين الأنجاس فى جوانتانامو .. و المعتقلين اللى بيغتصبوا .. و الأماكن اللى بتمنع دخول العرب و الكلاب فى أوروبا .. و التليفزيون اللى مانع مذيعات من الظهور على شاشته علشان محجبة .. محجبة.. الحمد لله إن إحنا إتطورنا و بقينا خواجات و عشنا و شوفنا مكان فى مصر اللى إبتسامتها ما تتنسيش يمنع دخول المحجبات ، الله طب .. و إشمعنى بقى المايوهات.